A Asociación de Dano Cerebral Adquirido de Ourense (DCA Ourense) desenvolveu ao longo do ano 2025 o proxecto “Servizo Integral de Atención e Fomento da Autonomía para Persoas con Dano Cerebral no Concello de Ourense”, unha iniciativa centrada na rehabilitación e na mellora da calidade de vida das persoas con Dano Cerebral Adquirido (DCA). Esta actuación foi posible grazas á subvención de 38.319,62 euros concedida polo Concello de Ourense no marco da súa liña de apoio a entidades sociais.
O proxecto permitiu ofrecer 4.992 horas de atención directa especializada entre os meses de xaneiro e outubro de 2025. Estes servizos prestáronse desde o noso centro de rehabilitación especializada en Dano Cerebral Adquirido, un recurso pioneiro na provincia que atende a persoas afectadas por ictus, traumatismos cranioencefálicos, anoxias, tumores cerebrais e outras causas de DCA.
O equipo profesional estivo formado por 14 especialistas de áreas como fisioterapia neurolóxica, logopedia, terapia ocupacional, neuropsicoloxía, traballo social e educación social, cun modelo de intervención multidisciplinar e centrado na persoa. Este enfoque permitiu abordar o dano cerebral desde unha perspectiva integral, atendendo tanto ás secuelas físicas e cognitivas como ás emocionais e sociais.
Entre os principais servizos desenvolvidos durante o proxecto destacan:
-
Fisioterapia neurolóxica individualizada, centrada na recuperación funcional e no mantemento das capacidades motoras.
-
Logopedia para a mellora da comunicación e a deglutición, especialmente en persoas con afasia ou disfagia.
-
Terapia ocupacional orientada á recuperación da autonomía nas actividades básicas da vida diaria, como vestirse, comer ou desprazarse.
-
Neuropsicoloxía, que traballa sobre a memoria, a atención, o control emocional ou o comportamento social.
-
Traballo social e educación social, dirixidos tanto ás persoas con DCA como ás súas familias, para facilitar o acceso a recursos, a formación e a integración social.
Durante o 2025, un total de 107 persoas usuarias recibiron atención directa, superando os obxectivos previstos. Ademais, 140 familias recibiron apoio social ou participaron en accións formativas e comunitarias. Estes datos reflicten o impacto do proxecto na rede local de apoio ao Dano Cerebral e consolidan o servizo como unha referencia no ámbito sociosanitario do municipio.
Cómpre salientar que esta actuación dá continuidade ao crecemento planificado pola entidade nos últimos anos. A incorporación progresiva de novos perfís profesionais e a ampliación da capacidade de atención estaban xa recollidas tanto na memoria do proxecto do ano 2024 como no documento presentado para a convocatoria de 2025, reforzando así a coherencia do desenvolvemento estratéxico da entidade.
Desde a Asociación DCA Ourense queremos agradecer ao Concello de Ourense o seu apoio e compromiso cun colectivo que moitas veces queda desatendido dentro do sistema público de atención sociosanitaria. Nun contexto no que os recursos específicos para o Dano Cerebral seguen a ser escasos, proxectos como este son fundamentais para garantir unha atención digna, eficaz e centrada na persoa.
O impacto positivo do proxecto foi visible non só nas melloras funcionais das persoas usuarias, senón tamén na súa capacidade para reintegrarse na vida social, familiar e comunitaria. Deste xeito, o proxecto reafirma a relevancia dun modelo de atención integral ao Dano Cerebral en Ourense, accesible, especializado e sostible.
